Sverre - med hjartet på rette staden

Sveitsisk førjulstrivsel!

2007-01-08T18:59:00.000+01:00

Kva gjer lærarar med all denne ferien? Solfrid og eg er nye i gamet, så vi har ikkje full oversikt enno. Likevel valte vi å utnytte den uanstendig lange juleferien vår til eit høgdeopphald i ein liten sveitsisk landsby ved foten av Matterhorn. Raude blodlekamar skulle produserast, pudder skulle pumpast og ferien skulle nytast i fulle drag. Vi tok turen til Zermatt, heilt sør i Sveits - der vinteren var på plass og livet var godt å leve - o trivsel!

Elles fungerte det optimalt å kome tilbake til ferdig dekka julebord i Nordtjønnåsen lillejulaften...
Jula blei heilt topp, og vel tilbake i Norheimsund har vi allereie kasta oss over rettebunkar og planleggsarbeid, medan vi framleis ventar på snøen...

Godhet og godhet, fru Blom

2006-12-12T19:22:00.000+01:00

Øystein Hedstrøm skriv bok seier ryktet. Han har visstnok god tid - må vente på at Carl gir ut si bok, så han får det siste ordet. Den som ler sist sist, ler som kjent best.

Hedstrøm har valt arbeidstittelen 'Godhetens pris'. Kva er poenget med å vere beskjeden?

Ein tur gjennom Setesdalen...

2006-11-09T22:12:00.000+01:00

...er definitivt undervurdert. Stadnamna får tankane til å gå til Oddgeir Bruaset sin flotte reportasjeserie "Der ingen kunne tru at nokon kunne bu". Kvifor besøkte du aldri Setesdalen Oddgeir? Kvifor?

Men bloggen var ikkje død - ei heller Crouchy

2006-10-25T10:26:00.000+02:00

Hoi!
Eg lever og har det godt i Hardanger! Eplehausten har vore god, og eg har sett det største eplet nokon sinne. For dei som framleis ventar i andelaus spenning kan spenninga no utløysast: Norheimsund IL Hardanger berga plassen i 3.divisjon - den vonde trenden blei snudd, og med seks poeng på dei to siste kampane klatra dei til ein plass noko nær midten av sluttabellen.

Til glede for dykk lesarar vil eg gjerne dele ein fantastisk liten sak om bautaen Peter Crouch - og korleis ein kan ha nytte av ein tometers kropp. Ta ein kikk her

Fakta om Norheimsund - del 2

2006-09-28T20:02:00.000+02:00

Der er du igjen ja - velkomen skal du vere!

Eg lova dykk meir harde fakta om Norheimsund, og sidan eg er ein mann som står ved mine ord kan eg no stolt presentere del 2 i denne serien. Om det blir fleire delar vil mellom anna avhenge av responsen. Vil folket ha meir Norheimsund-kunnskap, eller nærmar det seg eit metningspunkt når de er ferdig med dette innlegget?

Nuvel, la oss likegodt fyre avgarde. I førre innlegg blei ordførar Sellesvold via merksemd, men noko meir om det kommunale regimet her i Kvam blei ikkje avslørt. Det folk flest i dette landet kallar kommunestyre, kallar ein her for heradsstyre - eit flott ord om eg skal seie det sjølv! Heradsstyret i Kvam er samansett av 27 representantar. Ap og Sp er dei største partia, med 6 representantar kvar. Vidare har KrF og Høgre fire kvar, medan SV, Venstre og Frp har 2 kvar. Heilt åleine er ein uavhengig representant, førebels usikker på kva han får utretta...

Når det gjeld arbeidsløysa i kommunen, verkar situasjonen å vere under kontroll. Eg har førebels ikkje møtt ein einaste arbeidsledig, og noko kø på aetat har eg heller ikkje registrert. Kvemmingane (folkesetnaden her blir kalla det) er nok eit folkeslag som alltids finn seg noko å gjere om det skulle knipe. Barnehagedekninga i kommunen er eg meir usikker på, men eg har heller ikkje sett nokre små barn tulle rundt på eiga hand, så det ser ut til at også dette er teke godt hand om av heradet.

Noko eg derimot er sikker på, er det lokale fotballaget Norheimsund IL Hardanger si tabellplassering i 3.divisjon, avdeling 15. Etter ei relativt respektabel innleiing på sesongen, har det butta kraftig imot dei siste rundane, og med seks strake tap har det unge mannskapet rota seg inn i botnstriden, og ligg i skrivande stund tredje sist berre to rundar før slutt. Håpet er å snu trenden og gi Loddefjord bank til helga - då er plassen sikra. Skulle den planen skjere seg kan ein risikere å måtte slå topplaget Voss borte i siste runde. Det er førebels uavklart om to eller tre lag rykker ned. Det blir mellom anna bestemt av kor mange lag frå Hordaland som rykker ned frå 2.divisjon. O spenning - oppdatering på utfallet av dette dramaet får du sjølvsagt eksklusivt her! Men først er det haustferie:)

Fakta om Norheimsund

2006-09-18T10:46:00.000+02:00

Kjære vener av Hardanger!

No har vi budd i Norheimsund i noko over ein månad, og eg byrjar å føle meg kompetent til å lære dykk eit og hint om bygda, som de kanskje ikkje visste frå før.

For det første bør det nemnast at Norheimsund er ein del av Kvam kommune, eller herad som det heiter her. Norheimsund konkurrerer med Øystese, som ligg ein 5-minutts biltur unna, om å vere kommunesenter. Rådhuset ligg i Norheimsund, eit opplagt kriterie for å bli kommunesenter. På den andre side ligg jo bowlingen i Øystese, og det gjer meg noko meir i tvil igjen. Andre tettstader i kommunen er mellom anna Vikøy, Ålvik, Tørvikbygd, Omastrand og Strandebarm. Totalt bur det om lag 8300 innbygjarar i Kvam herad, men her snakkar vi vekstkommune, der lokalpolitikarane har klemt til med ei målsetjing om å runde 10000 innbyggjarar i løpet av nær framtid.

Ordføraren i kommunen heiter Astrid Farestveit Selsvold (Ap). Trass i at kommunen etter måten er liten og oversiktleg har eg framleis ikkje møtt denne dama, men ut frå trivselnivået eg kjenner til mellom kommunen sine innbyggjarar, tek eg det for gitt at ho gjer ein heilt topp jobb. Eit svært tillitsvekkjande trekk er det at ho har sin eigen blogg! Den kan du ta ein nærmare kikk på her

Dette var berre litt innleiande informasjon om tilhøva i Norheimsund og Kvam. Eg lovar å kome tilbake med meir informasjon arbeidsløyse, barnehagedekning, tabellposisjon for det lokale fotballaget osv.

Til slutt vil eg berre påpeike at vi allereie har hatt besøk av opptil fleire her, og eg finn det merkeleg at Anette i nord trekk besøkstalet i tvil. Kan det ha noko med eigne erfaringar å gjere?

Ein sumar forbi

2006-08-24T18:51:00.000+02:00

Der var jammen ein sumar gått, og vi har vore på plass i Norheimsund i snart tre veker allereie. Etter 11 år i meir urbane strok, er det på mange vis godt å kome til ein plass som faktisk minner ein del om Stranda. Her er noko meir enn 3000 innbyggjarar, fjord og fjell på alle kantar og trivsel i høgsetet! Vi har busett oss downtown i penthousen på Cubus, den lokale puben, som viser fotballkampar i ny og ne, er næraste nabo, og elles i rusleavstand til alt ein kan ønskje seg innan detaljhandelen. Ikkje kom her og påstå at vi bur grisgrendt!

Sidan det har blitt eit lite hol i livshistoria mi her inne, kan eg kort oppsummere korleis sommaren fortona seg for familien Lindøy, akkompagnert av eit par snapshots som seier ein heil del.

Først av alt er det viktig å forklare at grunnen til at vi er så brune på bileta er at vi vart forfølgd av sol og godvér sommaren gjennom. Det er altså ikkje juks, he-he.. Regnbiletet er tatt med fordi det representerte eit aldri så lite unntak - då vi nær blei kvesta av lynet på vår veg ned igjen frå Grjøtet på Sunnmøre. Litt skummelt og litt moro...

Noregsferien inneheldt mellom anna glade hyttedagar i Søgne og på Færøyna, besøk hos foreldre, besteforeldre og vennar, fjelltur i Tafjordfjella. Hondaen fekk køyrt seg litt denne sommaren også. Det medførte at vi måtte skifte ut eksosanlegget, sjølv om det var gøy med litt frieksos også, for ei lita stund..

Når vi har fått budd oss litt meir inn her i Hardanger lovar eg å kome tilbake med høgdepunkt frå både bygde- og skuleliv. I mellomtida ser eg gjerne at de finn fram almannaken for å finne ut kva tid de har anledning til å avlegge denne vakre landsdelen eit besøk!

Endelig tilbake!

2006-06-20T19:47:00.000+02:00

Hei igjen!
Fylt av skam over latterleg dårleg oppdateringsfrekvens vågar eg meg på nytt ut i den spanande og rike blogg-verda. Sidan sist har blogg-verda faktisk blitt ein attraksjon rikare, då Steinar gjekk til det skritt å lansere si breenmachine. Gratulerer Steinar! (det var på tida, he-he...)

I desse deilige VM-tider er det vanskeleg å kome utanom fotballen. Så langt har det vore ei sann glede for ein konservativ fotballentusiast å registrere at normaliteten er nokon lunde oppretta, etter det famøse meisterskapet i Asia for fire år sidan. Eg må innrømme at eg er tilhengar av at lag som Sør-Korea ikkje spelar semifinale (det kan vi forsåvidt framleis ikkje utelukke, men tvilar, det gjer eg). No er eg likevel ikkje meir konservativ enn at eg kan glede meg over artige overraskingar, så lenge det skjer på kostnad av dei riktige laga... Det ville til dømes glede meg stort dersom Tsjekkia skulle banke Italia - så vi kan bli kvitt Italia først som sist. Eg høyrer heller ikkje med til dei som har lagt sin elsk på Brasil. Vel og merke er dei kapable til å spele fin offensiv gladfotball, men eg fiksar det ikkje heilt uansett. Moglegvis har det med å gjere at eg kanskje kunne tenke meg ein ny verdsmeister denne gongen (kva med England?), eller at eg ganske enkelt er lei av det evige maset i media om kor stor favoritt Brasil er. Er dei verkeleg det? Eg meiner nei.

Dei to første VM-vekene har bydd på mange minnerike hendingar. For å gi dykk eit lite innblikk i Sverre si VM-verd vil eg dele nokre få:

1) Italia-USA: I seg sjølv ein minnerik kamp, med herlig naiv fotball av USA, ein pinleg seanse av Italia og heile tre utvisningar. Det var likevel vår gode venn Scheie som stod for høgdepunkta då han til heile det norske folk kunne forkynne at sidekommentator Løken spradar rundt i ei italiensk landslagstrøye der nede i Tyskland, og meinte at Løken nok hadde eit spesielt forhold til Italia. Løken, stakkar, blei tydeleg brydd - først blei det berre stille, før kontoristen forsiktig fekk presisert at han hadde då ikkje gått i den trøya kvar dag. Festlig.

2)England-Trinidad&Tobago: Eigentleg ein fæl kamp i 80 minutt, heilt til Liverpool avgjorde med to kjappe mål. Då gjorde det ikkje all verda at Crouchy koste litt med hestehalen til trinidadaren.. Krona på verket var Stevie G sitt kremmerhus, som Matta ville kalla det. Stevie G følgde dessutan opp med ny goal mot svenskane i kveld, og med det slapp England unna det tyske spøkelset. Kva skulle eigentleg England gjort utan Pool-gutta?

3)Philip Lahm. Du verden for ein back! Ei openberring for meg, og eg tar sporenstreks sjølvkritikk på at eg ikkje har sett meir Bundesliga på NRK gjennom vinteren. Måtte berre Chelski ligge unna denne mannen - han er per dato større enn Roberto Carlos, og ein god del år yngre. Eigentleg fortener heile det tyske laget kreditt for offensiv gladfotball. Det var ikkje slik eg kjente Tyskland frå nokre år tilbake. Eg er redd tyskarane tar trofeet, men har eit ørlite håp om at England blir motstandar i finalen. O spenning!

Høgdepunkta er sjølvsagt mange fleire, men nok får vere nok for denne gong - kanskje deler eg fleire av dei før VM er omme. Følg med, følg med!

"Alt henger sammen med alt"

2006-05-18T22:36:00.000+02:00

Hei igjen!

"Alt henger sammen med alt" sa moder Gro ein gong. Sjeldan har vel nokon hatt meir rett, og sjeldan har vel nokon blitt meir urettmessig latterliggjort. Det er ikkje alltid like lett å bli forstått, og slik har nok Gro ofte følt det også. Derfor var det nok berre rett og rimeleg at ho fann det for godt å søke nye utfordringar i eit framandt land den gongen for nokre år sidan - alt heng jo som kjent saman med alt. No kjenner eg det er på tide å ta opp igjen arven etter Gro, og det er såleis berre rett og rimeleg å dedikere dette innlegget til vår ex-landsmoder.

Du sit kanskje der og tenkjer at dette kan ikkje stemme - alt kan vel ikkje henge saman med alt? Er det mogleg? Svaret er enkelt: ja. Gro har jo sagt det. Og om du framleis tvilar; gi meg ei utfordring, så vil eg (moglegvis med hjelp frå Gro) syne at påstanden på ingen måte er tatt ut av lufta.

Til slutt er det freistande å peike på ein samanheng som nok kan forklarast, men likevel gir grunn til undring. Når TINE vel å selje raspa Norvegia (også kalla pizzaost) til ein kilopris som er lågare enn ost i blokk, eller klump om du vil - betyr det at Norvegiaklumpen ein kjøper i butikken er eit produkt av mange små bitar av raspa Norvegia?

Om vér og vind

2006-05-02T22:06:00.000+02:00

Kjære godtfolk!

Tida er nok ein gong moden for nokre ord frå sunnmøringen i eksil i Kristiansand. I mangel på spanande nyhende og pirrande avsløringar å melde om, vel eg i dag å ta eit lite oppgjer med véret her nede på Palmekysten. Dei klimatiske føremonene med å flytte ned hit har førebels ikkje vist seg å vere imponerande. Vi skriv no 2.mai, og i ettermiddag måtte eg faktisk gå til det skritt å skru opp varmen på ovnen her i stova - dette verkar ulogisk ut frå det eg var lova av gode sørlendingar. Shortsen ligg framleis godt planta i skapet, tidspunkt for den første softisen har framleis ikkje vore ei aktuell problemstilling og badetemperaturen har framleis ikkje vore mogleg å måle gjennom den tjukke isen - alt dette medan mor kan melde om 15-20 grader på Nordvestlandet..sukk... Når sant skal seiast, og det skal det jo, så lovar Meteorologisk Institutt betre tider, og eg vel derfor å gi Palmekysten ein ny sjanse, men no bør vergudane sant å seie kome opp med noko deilig for å rette opp inntrykket.

Vel, nok om vér og vind - blir jo fort kjedelig den slags. Det som derimot ikkje blir kjedelig er Molde FK. Siger over bartelaget på Lerkendal var i sanning eit høgdepunkt av dei sjeldne, og gir grunn til optimisme framfor nok ein tøff batalje mot Brann i morgon, men også for heile sesongen. Du for ein balsam det hadde vore for sjela om Stavrum sine utvalte kunne halde seg unna botnstriden denne sesongen - la oss heller gå for medaljane! Helten over alle heltar på Lerkendal var keeperen med namnet som får tankane til å gå til Sunnmøre (oppskrift: set saman to namn som eigentleg ikkje passar saman, så får du i alle fall eit namn som ganske få andre har). Jan Kjell fortener heilt klart eit bilete her på bloggen - ei kjempe mellom menn!

Nok for i dag, men lovar å kome snart tilbake, om ikkje anna enn for å bøte på kritikken om at bloggen manglar anekdotar. Anekdotar kjem, berre vent!

Plokka plommor i Hardanger

2006-04-26T20:13:00.000+02:00

Hei og hå!
Det gledar ein enkel sunnmøring å sjå at etterspurnaden no er på bristepunktet, og her er eg altså igjen, med nokre små anekdotar frå livet som Sverre. Sidan sist har det skjedd både det eine og det andre. Molde FK har til dømes sikra seg nok eit poeng (utan å score mål), Daniel Berg Hestad har blitt ferdig med karantena si, og ikkje minst: Solfrid og eg har fått oss jobb i Norheimsund! Ikkje nok med det, vi takkar ja, og tar turen tilbake til det herlige Vestlandet når sommaren er på hell. Vår nye arbeidsstad er Framnes vgs., midt i hjartet av Hardanger. Vi har stor tru på at dette blir aldeles superbt, og ser fram til eit nytt og spennande kapittel i livet! Ingenting ville glede oss meir enn om folk flest tar turen innom på besøk, enten det er for å plukke plommer, stå på ski, bli kjent med den hardangerske folkesjela eller rett og slett for å treffe oss! Biletet under burde vere meir enn nok til å freiste kven som helst.

Elles lova eg jo å publisere nokre høgdepunkt frå vår deilige påskeferie på Sunnmøre. Etter å ha sortert vekk nokre av dei mest kompromitterande bileta vel eg no å gå til det skritt å gjere alvor av lovnaden. Desse bileta bør også vere av ein slik karakter at ein får lyst til å setje seg i bilen/på toget/på flyet for å oppsøke stadane som kjem til syne. Say no more.

Påskeferie - gode tider

2006-04-13T16:45:00.000+02:00

Hei igjen!

Vel tilbake hos mor og far på Stranda, etter 4 fabelaktige dagar i Tajordfjella. Litt endring av planar undervegs førte til at ruta blei Billingen-Torsbu-Veltdalshytta-Danskehytta-Grotli. Veret var nesten upåklageleg, noko ei herleg raud nase er det mest iaugefallande provet på... Biletet viser Veltdalshytta, i hjartet av Tafjordfjella - ein deilig plass på jord! Fleire bilete vil etter alt å døme bli publisert her etter kvart, så snart dei har passert ein streng sensur...

Elles var det med glede eg kunne registrere naudradioen Torsbu var utstyrt med, då vi kom fram omlag ved pausetid i den første serierunden. Gleda skulle etter kvart vise seg å bli endå større, då radiosporten kunne fortelje at så godt som alle måla kom rette vegen i Molde by. Serieleiing med 2 poeng etter ein runde må vel vere noko nær verdsrekord, og gjer førebels Østreim sitt tips om ei tosifra plassering for MFK til skamme. Medan eg framleis ventar på at Start og over halvparten av dei andre laga i Tippeligaen skal score sitt første mål, aktar eg å feire påske med fynd og klem og oppfordrar alle andre til å gjere det same! Ha ei fortryllande påske! Yours, S.

Trygt heim med SAS Braathens

2006-04-09T01:43:00.000+02:00

Kjære blogg-lesarar!
Om det skulle vere nokon som helst tvil: SAS Braathens klarte i dag det kunststykket å frakte både Solfrid og meg trygt frå Kjevik til Vigra, via Gardermoen. Det er sanneleg ikkje verst, og langt unna det mannen i gata ville sett sparepengane sine på i går. Men no er vi altså heime, etter at Marie sørga for ein knirkefri sisteetappe i Astraen frå Ålesund til Tegane 66. I skrivande stund har både Marie og Solfrid gått inn for landing i senga, og eg kan vel ikkje vere særleg snauare. Det er trass alt berre knappe 6 timar til klokka ringer og vi skal legge Tafjordfjella for våre føter med ski på.

Mitt kjære deportivo måtte dessverre ta den tunge vegen ned i 7.divisjon i dag, trass i ein råsterk 9-1-siger på bortebane i siste kamp. Kaptein Jensen gjekk føre med hattrick, men det heldt altså ikkje likevel. Framtida ser likevel lys ut, og med mange spennande unggutar i stallen kan vegen fort bli kort tilbake til gjevare selskap.

Elles går startskotet for Tippeligaen i morgon, med Molde Fotballklubb i ein av hovudrollane. MFK ser i år ut som ein soleklar kandidat til øvre halvdel av tabellen, og mykje skal gå gale om ikkje ein 7.plass skal vere innan rekkevidde, såvidt slått av Start på ein flatterande 6.plass. Du så spennande det skal bli! Tipsa for første serierunde må bli følgjande:
MFK-TIL H
LSK-RBK U
Start-Lyn H
VIF-Odd U
HamKam-Viking U
Stabæk-Sandefjord H
FFK-Brann B

Ei fortryllande påske ønskjer eg til alle som måtte vere innom her. Ta ein ekstra kikk på biletet, så ser de korleis mi påske etter alt å døme blir sjåande ut:)

Dykkar i æva,
Sverre

Svar til klagemåla

2006-03-29T20:04:00.000+02:00

Gode medmenneske! Etter klagemål og raljering over den latterlege oppdateringsfrekvensen på denne bloggen, vel eg no å gå til det skritt å love hyppigare oppdateringar. Eg har allereie starta. Den grovaste sjikanen måtte eg tole frå Steinar, som ikkje ein gong har somla seg til å lage ein eigen blogg. Oppfordringa er med dette ein realitet. Med det same vil eg nytte høvet til å gratulere den godeste Breen med ein smått sensasjonell siger for hans disiplar i N5 1BU, over det lovande mannskapet til deportivo langenes på Ashburton Grove denne onsdags ettermiddagen. Kjekt for han dette, og spesielt artig var det jo at Bjørnar Vikane fann tilbake til gamle takter!

Elles merkar eg meg også at Marie stadig ventar i spaning på kva som skjer på denne bloggen. Som ho heilt korrekt har observert, er det heller lite. Men no ventar altså nye, og langt betre tider! Må jo ha noko å skryte av når vi saman skal vandre gjennom dei deilige Sunnmørsalpane om kun kort tid. På denne turen reknar eg med å gjenta bedrifta, eller i alle høve nesten, som blinkskotet her viser.

Klarar ikkje å dy meg for å skryte litt av "Zbigniew Bonieks venner" - quizlaget vårt som gjekk til topps på fotball-quizen på Østsia i går. Takka vere solid innsats og enorm viten blei Umbro-jakkene våre med ein margin på heile 0,2 poeng til neste lag. At det var berre 4 lag som stilte er det vel ingen som bryr seg med...:) Nuvel, bør vel avslutte med dette, for ikkje å legge lista for høgt med tanke på lengden i mine no stadig hyppigare drypp frå kvardagen. Over og ut.

Cupfinalen 2005 - ein augneblink for historiebøkene

2006-02-06T20:17:00.000+01:00

For eit lag, for ein kamp!

CAMP HIA

2006-01-12T15:19:00.000+01:00

Hadde det berre vore slik at det ikkje var tvingande naudsynt å drive inntektserverv her i verda....